早排中电信董事长王晓初同埋联通董事长常小兵都透露过，话行业重组方案应该唔使好耐就会公布。「说时迟，那时快」，近日内地就有风声话方案将会今个月底前出炉，仲有人根据以往两次电讯业重组公布日期分析，认为最有可能世界电讯日(5月17日)公布。虽然靠经验得出结论可能唔系咁有说服力，之不过瑞信就认为，个日子都符合佢地预期上半年公布的睇法。

　　小琴仲听讲，原来新营运商管理层都会有新变动。好似中移动董事长王建宙咁，就会原职留任，而唔系重组后退休。而重组后规模更加「巨无霸」的中移，更会获得常小兵加盟帮手。不过，嘉诚证券就指出，咁样安排可能唔系咁受欢迎，皆因常生联通做惯「一哥」，突然降格做「老二」，唔高兴都可以话系人之常情。

　　至于由中电信并联通CDMA网，同埋由网通并联通GSM网新公司，则分别会由王晓初同网通现任董事长张春江掌舵，而现时工业和信息化部电信管理局局长苏金生，都会调任到新中电信帮手做总裁。

　　王建宙留任 常小兵过档

　　呢个新人事重组方案，睇�a投行方面都好满意。嘉诚就话，新方案比前一个合理好多，唔单止可以保留番晒电讯业老行尊，更加可以令成个重组计划顺利过渡。不过，对于方案公布日子，嘉诚就觉得无咁快，以目前进度，应该要奥运之后先会出台，而重组大概需要6个月时间。