诸政客：成交唔配合咪咁乐观

　　美国上星期减息0.25厘,系徇众要求,已经暗示唔会再减,数据有好有淡,美元反弹,道指重越万三点,市场说是好现象,呢排道指虽然都有反覆,但系收市阵跌唔多,一有机会就炒上,又带起港股,咁A股仲系假期,港股可以跟道指炒上。

　　香港唔跟美国减息,已经有预告,但系地产股一样炒上,有新盘话快推出,已经放风。楼市静一阵,系冇新盘炒,如果有新盘,又再炒过,不过系豪宅盘,照计未必带旺成个楼市,但系所有地产股都好,希望又有个小阳春。

　　金价同油价都跌,金价跌得多,紫金A股好大反覆,又有关于税消息,插得更深,H股就唔跟A股走,金价由高位跌15%,都唔简单,拖埋其他金属都跌,油价由高位一路软,又唔算急跌,有利航空同航运股。

　　内地电力股果然炒起,传系补贴,但系电力股好又担心煤炭股有压力,咁神华(01088)大手减持,只兖州煤(01171)仲系反覆向好,政策好难谂。好似有段唔起眼消息,话内地景点收费又要整顿,今年只准减唔准加费,中旅(00308)咁反覆,睇同呢个消息有关。

　　工行斟掂永隆成数高

　　内银股首季业绩靓,只只好,至差只中信行(00998)都好得,落后中行(03988)跟得上,计起上,都系建行(00939)靓,走势算系唔错,暂时建行冇乜消息,表现仲系咁坚挺,可以住睇中长线,或者吼反覆入市。工行(01398)消息系斟紧永隆(00096),睇斟掂成数高,只不过永隆首季为次按撇数出现亏损,又要拖迟。工行收购系咪着数要睇条件。

　　A股融资融券又传押后,融资系可以孖展买卖,融券即系可以借货沽空,其实消息系好系淡仲系靠估,放假前当住好消息炒,如果押后,个市点样反应呢?借孖展要等经纪行有资金,要银行帮手,借货沽空系咪咁普及,香港都唔易搞,只系基金着数。

　　港股炒上,成交仲未配合,可以睇好,但唔好咁乐观,基本上仲系阻力范围之内,冇大成交,唔易大突破,依家会一千点上落,又系炒股唔炒市时候。A股发展始终唔可以忽视,唔好因为好几日就咁乐观,继续会有反覆。